Լրահոս / Հայտարարություններ
Դիվանագիտական դպրոցի ուսումնական այցն Արցախ
01.05.2022
Ապրիլի 25-ից 28-ը տեղի ունեցավ ՀՀ ԱԳՆ դիվանագիտական դպրոցի 2021-22թթ. ունկնդիրների և 2020-21թթ. ծրագրի շրջանավարտ՝ ԱԳՆ աշխատակիցների ուսումնական այցն Արցախ:
Ապրիլի 26-ին Դիվանագիտական դպրոցի ուսումնական այցի մասնակիցներն այցելեցին Ստեփանակերտի հուշահամալիր և ծաղիկներ խոնարհեցին ցեղասպանության զոհերի հիշատակին նվիրված հուշարձանի և արցախյան պատերազմներում զոհված ազատամարտիկների գերեզմաններին:
Նույն օրը հանդիպումներ տեղի ունեցան Արցախի Հանրապետության արտաքին գործերի նախարար Դավիթ Բաբայանի, Մարդու իրավունքների պաշտպան Գեղամ Ստեփանյանի, պետական նախարար Արտակ Բեգլարյանի, Անվտանգության խորհրդի քարտուղար Վիտալի Բալասանյանի և Արցախի Հանրապետության նախագահ Արայիկ Հարությունյանի հետ: Ապրիլի 27-ին այցի մասնակիցները հանդիպեցին նաև Ազգային ժողովի նախագահ Արթուր Թովմասյանի հետ:
Հանդիպումների ընթացքում ԴԴ ունկնդիրներին և շրջանավարտներին ներկայացվեցին 44-օրյա պատերազմից հետո ստեղծված իրավիճակը, անվտանգային խնդիրները հաղթահարելու ուղղությամբ իրականացվող աշխատանքները, հակամարտության կարգավորման հեռանկարները: Քննարկվեցին հայկական երկու պետությունների միջև համագործակցության ուղղությունները, գլոբալ և տարածաշրջանային մարտահրավերները: Ունկնդիրները նաև ծանոթացան Մարդու իրավունքների պաշտպանի հաստատության կողմից իրականացված փաստահավաք աշխատանքներին:
ԴԴ ունկնդիրները և շրջանավարտները Ստեփանակերտում այցելեցին ԼՂՀ զոհված ազատամարտիկների հարազատների միություն-թանգարան, ԼՂՀ անհայտ կորած ազատամարտիկների հարազատների միություն-թանգարան, Արցախի պետական պատմաերկրագիտական թանգարան և ազատամարտիկների պուրակ:
Հայաստանի դիվանագիտական դպրոցի ունկնդիրները և շրջանավարտներն այցելեցին նաև Գանձասարի վանական համալիր և Մատենադարանի Գանձասարի մասնաճյուղ: